بند المباني
يعتبر بند المباني أول وأهم بنود التشطيبات في أي مشروع إنشائي، حيث يعتبر الأساس اللي بيتبني عليه الهيكل المعماري ويحدد جودته ومتانته. تتطلب أعمال المباني الالتزام بمواصفات فنية دقيقة ومعايير هندسية صارمة لضمان سلامة المبنى واستدامته.
أنواع الطوب من حيث التصنيع
1- نص ألي (مصانع) 2- يدوي
أول حاجه بعملها في بند المباني بحصر الطوب المطلوب مع اضافة نسبة هالك 2% و بعد معرف عدد الطوب المطلوب بحسب كم متر رمل و كم طن أسمنت
يعني مثلا لو عندي اجمالي المباني الي هتتبني 250م2 و أبعاد الطوبه الي هستخدمها 6*12*25
و لو يكن كل المباني بسمك نص طوبة كدة مساحة الطوبة 12*6 ب0.0072 م2 هقسم مساحة المباني علي مساحة الطوبة 0.0072/250هيطلع عدد الطوب المطلوب 34722 طوبة مع اضافة الهالك 35416 يعني بالتقريب 35000 طوبة و عندي ال1000 طوبة بيحتاج 3.5 شكارة اسمنت فهنقول 35*3.5 ب122.5 شكارة و الطن فيه 20 شكارة اسمنت يعني بالتقريب هنحتاج 6.5 طن اسمنت و عندنا م3 رمل بيكفي 6شكارة اسمنت يعني 6.5 طن هنحتجلهم 21.5م*3 رمل
- أنواع الطوب
1- الطوبة المصمت
طوبه اسمنتي مصمته ابعادها (25*12*6) او (23*11*6) او (21*10*6) حسب الطلب و من مميزاتها ان لها مقاومة عالية في الرطوبة لذا نستخدمها في:
- أول 3 مداميك في الحيطه (المدماج هو صف الطوب) و بعد كدة كل مترمدماك واحد
- نستخدمها لحد ارتفاع 1.2م في جميع حوائط الحمامات.
ليه مبنستخدمهاش في الحوائط كلها طلاما هي ليها مقاومة رطوبة عالية؟
علشان وزنها تقيل مقارنه بباقي أنواع الطوب و ده بنسبة كبيرة مبيبقاش معمول حسابة في تصميم الخرسانات
2- الطوبة المفرغة
ي طوبة اسمنتيه بس مفرغة زيها زي الطوبة المصمت بس مفرغة لتقليل الوزن و ابعادها نفس ابعاد المصمت بس ضعف الارتفاع (ارتفاع الطوبة المصمت 6سم و الطوبة المفرغة 12سم)
و تستخدم في تكملة بناء الحائط و معظم استخدامها بيكون في البدروم.
3- الطوب الطفلي
ده اكتر انواع الطوب انتشارا و ارخصهم في السعر و في منه الي بنفس ارتفاع المصمت 6سم و في منه الدوبل 12سم و ده بنكمل بيه باقي شغل الحوائط مع الطوب المصمت
يعني كدة الحائط عندي بيتبني بالطوب (المصمت و المفرغ) أو (الطوب المصمت و الطفلي) و ده الشائع وده بيكون حسب المواصفات المطلوبة
دول اكتر أنواع الطوب المستخدمه في التشطيبات
مواصفات وأشتراطات أعمال المباني
بعد مجهزنا كل التشوينات بتاعتنا نبدأ بالبنا طبقا لرسومات التنفيذ
1- اول حاجة نعملها نرش مية قبل البنا في الاماكن الي هبني عليها
2- أشوف علي الرسمه أطول حيطة عندي و ابدأ بيها و بحط طوبة في أول الحيطه الي هتتبني و طوبة في الاخر و بكون واخد أبعادهم من الأعمدة و بعد كدة البنا بيشد خيط عليهم و بينزل سواعي (خيوط رأسية) علشان أفقية الحيطه و بالذات في أماكن الشبابيك و الأبواب و يكمل بنا و الحيطه ده هتبقي الامام بتاعي في باقي الشغل و ده بيبقي اسمه أد المباني
3- أي نقطة اتصال حيطه بحيطة بعمل طرف رباط في المباني زي الي في الصورة علشان بعد كدة الحيطة متفصلش, ولو اتصال حائط بعمود بركب في العمود كانات مباني
4- مينفعش اخلي البنا يبني الحيطه كلها كأرتفاع مرة واحدة, يبني متر واحد ارتفاع و تاني يوم يكمل
5- مينفعش العراميس (الفاصل بين كل طوبة و طوبة) تبقي فوق بعضها علشان ده بتبقي نقطة ضعف في المبني
6- في اخر الحيطه لما اعمل تشحيط للمباني يعني احط خشب في نقطة اتصال الحيطه بالسقف او الكمرة كل متر خشبة
كيفية استلام اعمال المباني
1- استلم من الصنايعي افقية الحائط بميزان الخيط (ميزان العصفورة) و يكون ماسك الميزان بطريقة صحيحة
2- اتأكد من تربيعة الغرفة واحده بحيث لو عندي حائطين موازين لبعض اقيس بالمتر المسافة بينهم في أول الحائطين و في اخر الحائطين لازم يبقي واحده علشان بعد كدة متقبلناش مشاكل
3- اتأكد ان العراميس مش فوق بعضها
4- مستخدم الطوب المصمت في اول 3 مداميك في جميع الحوائط و اول متر في الحمامات و المطابخ و حوالين الشبابيك و الأبواب
5- عمل تشحيط للمباني كل متر
حساب المقاول
بكون متفق مع المقاول قبل الشغل علي سعر الالف طوبة و علي حسب نوع الطوبة بيتحدد السعر, اغلي طوبة الطوبة الاسمنتي المفرغة(الدوبل) و بعدها الطوبة الطفلي الدوبل و بعدها الطوبة الاسمنتي المصمته و ارخصهم الطوبة الطفلي الصغيره
حاليا في شهر 10 سنة 2024 سعر الالف طوبة من 800 جنية الي 1500 جنية
بعد ما المقاول يخلص كل شغله و سلمه للمهندس بيتعد الطوب الي اتبني كل حيطه بعد الطوب الافقي و الطوب الرأسي و بضربهم في بعض و هكذا في كل الحوائط, ده طريقة الحصر مينفعش احصر بالمتر علشان كدة ببقي بذودله قيمة المونة الي استخدمها.