بعد أعمال المباني بنبدأ بأعمال الطرطشة و البؤج, هذه أهم خطوة في تجهيز الحوائط للمحارة.
الطرطشة
ما هي الطرطشة
الطرطشة عبارة عن طبقة خشنة بين المحارة و المباني علشان تمسك فيها المحارة, بتكون الطرطشة مكونة من أسمنت و رمل و ماء و دول بردو هما مكونات المحارة بس الأختلاف ان نسبة الأسمنت بتبقي أكبر في الطرطشة عن المحاره, بتبقي سمك الطرطشة من 1.5 سم الي 2.5 سم.
طريقة تنفيذ الطرطشة
1- رش المباني بالماء
2- تجهيز مونة الطرطشة ( 6 شكاير أسمنت لكل متر مربع رمل )
3- نحط المياه علي الخلطة و نقلب كويس لحد متبقي المونة شبه سائلة
4- نأخذ من المونة و نبدأ نطرطش علي الحوائط بالمسطرين
طريقة استلام الطرطشة
1- ان تكون الطرطشة مغطية الحوائط بالكامل بمعني ان ميكنش في حتت في المباني باينة من الطرطشة (اسمها حتت حرامية)
2- سمك الطرطشة ميقلش عن 1 سم
3- ان تكون الطرطشة خشنة و محببة
البؤج
ما هي البؤج
البؤج بتبقي عبارة عن كتل محارة بتكون متوزعه علي الحوائط كل 2 متر رأسي و أفقي بؤجه, بنبدأ نعمل البؤج بعط الطرطشة و ده الي بيبقي بروز المحارة مساوي للبؤج فيما بعد علشان أضمن أن المحارة كلها تبقي مستوي واحد وعلشان لما أسس كهرباء و سباكة تبقي علب الكهرباء و الخلاطات مساوية للمحارة ميكنش في حاجه بارزة أو غاطسه و أخش في مشاكل التعديل.
طريقة تنفيذ البؤج
1- كل 2 متر رأسي و افقي بحط كتلة من المونة (بؤجه)
2- بنشد خيط علي اطول ضلع زي معملنا في المباني و نشد خيط عمودي عليه
3- بنظبط بروز البؤج مع بعض بالدراع
4- بنظبط البؤج بالزاوية عند الأركان
ملحوظه (لو استخدمنا جبس في البؤج علشان يشد بسرعه (المونة تنشف بسرعه) لازم نشيل البؤج و احنا بنمحر)
طريقة استلام البؤج
1- اتاكد بالدراع ان افقية و رأسية البؤج مفهاش ميول, و يفضل أحط ميزان الميه علي الدراع
2- الزواية عند الأركان تكون مظبوطة 90 درجة
3- تربيعة الغرفة تكون مضبوطة بحيث ان اقيس من الخيط الي اتشد للبؤج و المقاسات تبقي واحده لكل جنب
لازم أتاكد ان البؤج مضبوطة علشان ده الي بيترتب عليه كل بنود التشطيب فيما بعد, يعني لو البؤج مضبوطة و المحاره مضبوطة مش هتقابلني مشاكل و انا بنفذ باقي البنود علشان كدة لازم أتاكد من البؤج و المحارة لما تخلص انها مضبوطة
نصائح لأعمال الطرطشة و البؤج
- أتاكد من نظافة الحوائط قبل الطرطشة و أرش مياه, علشان ده هيأثر علي التصاق المحارة بالحوائط
- مشتغلش في الحوائط بعد الطرطشة و البؤج لمدة يومين علي الأقل بحيث تكون الطرطشة نشفة
- استخدم رمله حرشة (خشنة) و متكونش ناعمة
- استخدم أسمنت رتبته متقلش عن 42.5
الخلاصة
الطرطشة و البؤج أهم حاجة في التشطيبات علشان ده الي بيترتب عليه كل بنود التشطيبات علشان كدة لازم أركز في الخطوات أثناء التنفيذ.